ស្រុកអង្គរធំ

ជាស្រុកមួយដែលតូចជាងគេក្នុងចំណោមស្រុកតូចៗដទៃទៀតនៅក្នុងខេត្តសៀមរាប ។​ការពិតទៅស្រុក​អង្គរធំនេះ មិនមែនជាទីកន្លែងរបស់ប្រាសាទអង្គរធំដ៏ល្បីល្បាញនោះទេ ប៉ុន្តែជាស្រុកមួយដែលរក្សាប្រពៃណីទំនៀមទំលាប់បុរាណច្រើនជាងគេបំផុតក្នុងខេត្តសៀមរាប ដែលភ្ញៀវអាចចូលទស្សនាតាមផ្លូវពេលធ្វើដំណើរទៅ ឬត្រឡប់ពីស្រុក​បន្ទាយ​ស្រី ឬអង្គរជុំ​ឬស្រុកវ៉ារិន។ ទីតាំងដែលពេញនិយមសម្រាប់អ្នកទស្សនាគឺ​វិទ្យាស្ថាន​វាយនភណ្ឌ​ប្រពៃណីខ្មែរ (IKTT)។​ មជ្ឈមណ្ឌលតម្បាញសូត្រនេះ បានបង្កើតឡើងដោយមានការគាំទ្រពីប្រទេសជប៉ុន ភ្ញៀវអាចមើលពីរបៀបត្បាញសូត្របែបប្រពៃណីខ្មែរនៅទីនេះ។ លើសពីនេះ មជ្ឈមណ្ឌលក៏មានទីកន្លែងសម្រាប់ស្នាក់នៅ មានការរៀបចំស្រដៀងនឹងផ្ទះសំណាក់ក្នុងផងដែរ។ ស្រុកអង្គរធំក៏មានកន្លែងស្នាក់នៅដ៏ប្រណិតបែបធម្មជាតិដែរ The Beige ជាកន្លែងស្នាក់នៅរបៀបជាតង់បែបទំនើបស្តង់ដាជប៉ុន។ ស្នាក់នៅក្នុងតង់ដ៏ប្រណិតលក្ខណៈ​ធម្មជាតិនេះ ភ្ញៀវក៏នឹងរីករាយជាមួយការហែលទឹកលេងក្នុងអាងដ៏ធំដែលអាចមើលឃើញព្រៃឈើតូចៗទៀតផង។ អ្នកទេសចរអាចធ្វើ​ដំណើរ​ទៅ​ភ្នំចង្ក្រានរោយ នៅក្នុងស្រុកវ៉ារិនឆ្លងកាត់តាមស្រុកអង្គរធំ ។

មានសិប្បកម្មច្រើនប្រភេទផ្សេងនៅក្នុងស្រុករួមទាំងផលិតផលស្ករត្នោត កន្រ្តកផ្តៅ ត្បាញកន្ទេល ការផលិតធូបបែបបុរាណដ៏ធំក្នុងខេត្ត និងឧបករណ៍ភ្លេងប្រពៃណី។