សុន្ទរកថាស្វាគមន៍របស់អភិបាលខេត្ត
សុន្ទរកថាស្វាគមន៍របស់ លោក បណ្ឌិត ឃឹម ប៊ុនសុង អភិបាលខេត្តសៀមរាប
ខ្ញុំមានសេចក្តីសោមនស្សរីករាយយ៉ាងក្រៃលែង ដែលបានស្វាគមន៍អ្នកមកកាន់គេហទំព័រ សៀមរាបក្រៅពីប្រាសាទ ដែលជាគេហទំព័រមួយសម្រាប់ចង្អុលបង្ហាញដល់ភ្ញៀវទេសចរជាតិ-អន្តរជាតិនូវកន្លែងកម្សាន្តជាច្រើនបែបសហគមន៍ទេសចរណ៍ អេកូ-ទេសចរណ៍ ទេសចរណ៍បែបផ្សងព្រេង និងជាពិសេសបង្ហាញពីប្រពៃណីទំនៀមទំលាប់នៃការរស់នៅរបស់ប្រជាជនខ្មែរនៅតាមសហគមន៍នានាក្នុងខេត្តសៀមរាប ។
ខេត្តសៀមរាប ជាតំបន់ប៉ូលទេសចរណ៍មួយដ៏សំខាន់នៅក្នុងព្រះរាជាណាចក្រកម្ពុជា ជាតំបន់ដែលមានសក្តានុពលទេសចរណ៍ទាំងវប្បធម៌ និងធម្មជាតិ ។ ក្រៅអំពីការទស្សនាប្រាង្គបា្រសាទនានាជាច្រើន ជាពិសេសប្រាសាទអង្គរវត្តដែលជាវិមានសាសនាដ៏ធំបំផុត និងជាផ្នែកមួយនៃអច្ឆរិយវត្ថុស្ថាបត្យកម្មរបស់ពិភពលោក យើងនៅមានតំបន់ទេសចរណ៍ជាច្រើនផ្សេងទៀតដូចជាបឹងទន្លេសាបដែលជាបឹងដ៏ធំមួយនៅក្នុងតំបន់អាស៊ីអាគ្នេយ៍ ការទស្សនាសកម្មភាពផ្សេងៗនៅតាមសហគមន៍ទេសចរណ៍ និងអេកូ-ទេសចរណ៍។
ការអភិវឌ្ឍនូវផលិតផលទេសចរណ៍ និងគោលដៅទេសចរណ៍ថ្មីៗនៅតំបន់ជុំវិញអង្គរ គឺពិតជាបានផ្តល់ផលប្រយោជន៍ផ្នែកសេដ្ឋកិច្ចសង្គម ផ្តល់នូវការងារដោយផ្ទាល់ដល់ប្រជាពលរដ្ឋ កាត់បន្ថយនូវការធ្វើចំណាក ស្រុក និងបានចូលរួមកាត់បន្ថយភាពក្រីក្រតាមរយៈទេសចរណ៍ផងដែរ ។
សៀមរាបក្រៅពីប្រាសាទ នឹងនាំទេសចរទាំងឡាយឲ្យស្គាល់ពីជីវភាពរស់នៅពិតៗរបស់ប្រជាជនកម្ពុជា ការស្នាក់នៅផ្ទាល់ជាមួយប្រជាជន ដើរកម្សាន្តក្នុងព្រៃសហគមន៍ជាពិសេសព្រៃកោងកាងទឹកសាបដ៏ស្រស់ស្អាតការជិះរទេះគោ ជិះទូកកម្សាន្ត និងទស្សនាផ្ទះបណ្តែតនៅបឹងទន្លេសាប ទស្សនាព្រៃលិចទឹក ទស្សនាសត្វស្លាបទឹក ការស្នាក់នៅជាមួយប្រជាជននៅតាមសហគមន៍ ការបោះតង់…. ។
ការចូលរួមរបស់ភ្ញៀវទេសចរទៅកាន់តំបន់សហគមន៍ទេសចរណ៍ អេកូ-ទេសចរណ៍ គឺជាជោគជ័យមួយដ៏ត្រចះត្រចង់នៃសហគមន៍ទេសចរណ៍ទាំងនោះ ដែលបានប្រែក្លាយតំបន់ទាំងនោះឲ្យទៅជាតំបន់មានការអភិវឌ្ឍ និងប្រែក្លាយធនធានផ្សេងៗទៅជាផលិតផលទេសចរណ៍ដ៏ទាក់ទាញ ជាពិសេសបានប្រែក្លាយទម្លាប់នៃការកាប់បំផ្លាញព្រៃឈើ ការបរបាញ់សត្វព្រៃ ទៅជាមគ្គុទ្ទេសក៍ទេសចរណ៍ ឬជាអ្នកឧទ្ទេសនាំភ្ញៀវ ទស្សនាព្រៃ និងសត្វព្រៃ…។
ក្នុងនាមប្រជាជនទាំងអស់ ខ្ញុំនឹងទន្ទឹងរង់ចាំស្វាគមន៍អ្នកមកកាន់សហគមន៍ទេសចរណ៍ អេកូ-ទេសចរណ៍ហើយខ្ញុំជឿជាក់ថាអ្នកនឹងរីករាយក្នុងការទស្សនា និងការស្នាក់នៅក្នុងសហគមន៍ទេសចរណ៍របស់យើង។
សូមជូនពរលោក លោកស្រីជួបពុទ្ធពរ៤ប្រការ គឺអាយុ វណ្ណៈ សុខៈ ពាលៈ កុំបីឃ្លៀងឃ្លាតឡើយ
លោក បណ្ឌិត ឃឹម ប៊ុនសុង អភិបាលខេត្តសៀមរាប